阿沙比否認種族歧視指控。(Getty Images)

意大利足總周二(19日)宣布，日前被指控種族歧視嘅國際米蘭中堅法蘭斯高阿沙比，向國家隊領隊史巴列堤解釋同商議，決定退出今次大軍，唔會隨隊出發去美國參加2場熱身賽。

國際米蘭上場聯賽同拿玻里打和1比1，比賽中拿玻里嘅巴西黑人球員祖安古靴美，向球證投訴被法蘭斯高阿沙比用種族歧視字句侮辱，雖然阿沙比賽後同佢道歉並和好，但最後搞到連國家隊都踢唔到。

意大利足總表示：「根據國家隊內部指引，阿沙比報到後，已向史巴列堤同隊友解釋涉嫌種族歧視事件，還原事件後我哋認為阿沙比並冇任何種族歧視意圖，不過大家同意阿沙比暫時離開國家隊，令佢同球隊都可以安心備戰。」

意大利去美國踢2場熱身賽，周五(22日)先對委內瑞拉，下周一(25日)再鬥厄瓜多爾。